„ევროპული საქართველოს“ დეპუტატი გიორგი კანდელაკი, რომელიც მისივე ინფორმაციით, სამართალდამცავებმა ეროვნული ბიბლიოთეკის შენობიდან განარიდეს, აქციაზე დაბრუნდა.

როგორც კანდელაკმა ჟურნალისტებს განუცხადა, მას თავისუფლება უკანონოდ აღუკვეთეს.

„ჩემთვის ვიდექი და საერთოდ არაფერს არ ვაკეთებდი, ანუ მაინც უკანონოდ აღმიკვეთეს თავისუფლება. სამწუხაროდ, ჩვენი სამი მეგობარი, სამი აქტივისტი კვლავ დაკავებულია. ისინი კახეთის გზატკეცილზე წაიყვანეს. ეს არის აგონია, ასლან აბაშიძის ბოლო პერიოდს მაგონებს ბიძინა ივანიშვილის რეჟიმის აგონია. აცხადებს გიორგი კანდელაკი. 


ასევე დაკავებული გიგი უგულავა გაანთავისუფლეს.

„მე ვიდექი ფურცელაძის ქუჩის კუთხეში, რა დროსაც დამიჭირეს. ავლაბარში მიმიყვანეს. განგარიდესო, ასე მითხრეს. განრიდება ვითომ მათ ჰგონიათ, რომ კანონიერია, ესეც უკანონოა. არაფერი არ ხდებოდა საერთოდ იმ მომენტში,“ - აცხადებს კანდელაკი."ევროპული საქართველოს" ერთ-ერთი ლიდერი გიგი უგულავა, რომელიც საჯარო ბიბლიოთეკიდან პოლიციამ გაიყვანა, ყვება, რომ ის სამართალდამცველებმა ავლაბრის მეტროსთან ჩამოსვეს. ამის შესახებ მან ჟურნალისტებთან ისაუბრა.

უგულავას თქმით, პოლიციამ უთხრა, რომ მის სიტყვას შესაძლოა, ესკალაცია მოჰყოლოდა და ამიტომ განარიდეს.

"მითხრეს, პარტიის ლიდერი ხარ და შენს სიტყვას შესაძლოა, ესკალაცია მოჰყვესო. ჩემს სიტყვას თუ შეიძლება, რომ ასეთი შედეგი მოჰყვეს, ეს მხოლოდ კომპლიმენტია. ავლაბრისკენ წავედით, იქ ჩამომსვეს, საფულეც არ მქონდა და ღვთისნიერმა "ტაქსისტმა" მომიყვანა", - განაცხადა უგულავამ.

დღეს პიკეტირება დამთავრებულია, შევიკრიბებით ხვალ თუ იმუშავებს პარალმენტი ან მაშინ, როცა იმუშავებს,- ამის შესახებ მოძრაობა „სირცხვილიას“ ერთ-ერთმა ლიდერმა შოთა დიღმელაშვილმა ჟურნალისტებს განუცხადა.

პარლამენტის შენობის უკანა შესასვლელთან სამართალდამცავებსა და აქციის მონაწილეებს შორის ფიზიკური დაპირისპირება მოხდა.

ადგილზე იმყოფებიან ასევე ოპოზიციონერი ლიდერებიც.

ფიზიკური დაპირისპირება მას შემდეგ დაიწყო, რაც აქციის მონაწილეები სამართალდამცავების მიერ გაკეთებულ რკინის ჯებირებზე საღებავით წარწერების გაკეთებას ცდილობდნენ. სამართალდამცავებმა მათ ამის საშუალება არ მისცეს, თუმცა რამდენიმე მათგანმა მაინც შეძლო საღებავით რკინის ჯებირზე წარწერის გაკეთება. აქციის მონაწილეებმა შეძლეს ასევე ჯებირებზე სტიკერების „შეცვალეს“ გაკვრა.„ეს ბარიკადები ვერ გაგვყოფს ჩვენ და „ქართულ ოცნებას“, ყველგან შევაწუხებთ და ვერანაირად ვერ მოგვიცილებენ თავიდან,“ - აცხადებენ აქციის მონაწილეები.

აქცის მონაწილეებმა ადგილზე მიიტანეს ასევე დოლარის კუპიურები ბიძინა ივანიშვილის გამოსახულებით.

ამომრჩეველს სჭირდებოდა თავისუფალი არჩევნები და ეს შანსი ჩვენი ამომრჩევლისთვის და ქვეყნისთვის უნდა მიგვეცა. ჩვენ ეს შანსი წავართვით მოსახლეობას, - ამის შესახებ პარლამენტის დამოუკიდებელმა დეპუტატმა გედევან ფოფხაძემ პლენარულ სხდომაზე განაცხადა.

რა თქმა უნდა, სასიამოვნო პროცესი ეს არავისთვის არის, თუმცა, ფაქტია, რომ ოპოზიციას აქვს თავის გეგმები და ამოცანები, ხშირ შემთხვევაში პარტიული ინტერესებიდან გამომდინარე, - ამის შესახებ „ქართული ოცნების" ზუგდიდის მაჟორიტარმა დეპუტატმა მერაბ ქვარაიამ ჟურნალისტებთან პარლამენტში განაცხადა, რითაც მან უპასუხა შეკითხვას, გრძნობს თუ არა პასუხისმგებლობას შექმნილ ვითარებაზე.

დეპუტატების ნაწილი პარლამენტში უკვე მივიდა. საკანონმდებლო ორგანოში ცოტა ხნის წინ მივიდნენ უმრავლესობის წევრები: დიმიტრი ხუნდაძე, თამაზ ნავერიანი და ნინო წილოსანი. პარლამენტში იმყოფებიან ირაკლი(დაჩი) ბერაია და მერაბ ქვარაია.

პოლიტიკოსები და აქციის მონაწილეები პარლამენტის გარშემო ცოცხალ ჯაჭვს აკეთებენ. ამის შესახებ ოპოზიციონერმა ლიდერმა ელენე ხოშტარიამ განაცხადა.

აქციის გამო, რუსთაველის გამზირი გადაიკეტა. თავდაპირველად, დედაქალაქის ცენტრალურ გამზირზე მოძრაობა ნაწილობრივ იყო შეზღუდული, თუმცა მას შემდეგ, რაც პირველი რესპუბლიკის მოედნიდან პარლამენტისკენ აქციის მონაწილეები მსვლელობით დაიძრნენ, რუსთაველის გამზირზე საავტომობილო მოძრაობა სრულად აიკრძალა.

2020 წლისთვის შენარჩუნდება შერეული საარჩევნო სისტემა, - ეს განცხადება „ქართული ოცნების“ სათაო ოფისში პარტიის გენერალურმა მდივანმა კახა კალაძემ განაცხადა.

გედევან ფოფხაძე განათლების კომიტეტს ტოვებს. დამოუკიდებელმა დეპუტატმა ამ გადაწყვეტილების შესახებ პარლამენტში, განათლების კომიტეტის სხდომაზე განაცხადა.