პოლიტიკური შეთანხმება საქართველოში 2020 წლის არჩევნებთან დაკავშირებით მმართველ უმრავლესობას და ოპოზიციას შორის, რომელსაც ჩვენ გასულ კვირას მტკიცედ მივესალმეთ, წარმოადგენს შესაძლებლობის ფანჯარას საქართველოს დემოკრატიული კონსოლიდაციისთვის, – აცხადებენ ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლები: ტიტუს კორლატეანი (რუმინეთი) და კლოდ კერნი (საფრანგეთი). განცხადება გაკეთდა 2020 წლის 11-12 მარტს თბილისში კორლატეანის ვიზიტის შემდეგ.

თანამომხსენებლები მიესალმებიან კონსტრუქციულ სულისკვეთებას, რომლითაც მიღწეული იყო შეთანხმება ყველა დაინტერესებულ მხარეს შორის საარჩევნო სისტემასთან დაკავშირებით, საარჩევნო ოლქების საფრთხილო საკითხის ჩათვლით. შესაბამისად, თანამომხსენებლები გამოთქვამენ იმედს, რომ თანამონაწილეობის და თანამშრომლობის ეს ახალი სულისკვეთება გაგრძელდება არჩევნების ორგანიზებისა და ჩატარების პროცესშიც.

„როგორც ჩვენ უკვე განვაცხადეთ გასულ კვირაში, ამ შეთანხმებას შეუძლია წვლილის შეტანა პოლიტიკურ გარემოში მუდმივი დაძაბულობის და პოლარიზაციის განმუხტვაში, რომლებიც აფერხებენ დემოკრატიულ პროცესებს საქართველოში. ჩვენ მოვუწოდებთ ყველა პოლიტიკურ მოთამაშეს ამ მუხტის შენარჩუნებისკენ და იმავე პოლიტიკური ნების და სიმწიფის გამოჩენისკენ, რათა შეთანხმება შედგეს სხვა საკითხებზეც, რომლებიც მათ შორის უთანხმოებას იწვევს“ – განაცხადეს თანამომხსენებლებმა.

ამ კონტექსტში თანამომხსენებლები აღნიშნავენ, რომ დაპირების შესრულება საარჩევნო პროცესის და მართლმსაჯულების სისტემის პოლიტიზირებაზე უარის თქმასთან დაკავშირებით უფრო რთული და სენსიტიური აღმოჩნდა, შესაბამისად, ისინი მოუწოდებენ პარტნიორებს, თავი შეიკავონ ნებისმიერი მოქმედებისგან, რომელმაც შეიძლება გაართულოს ან ეჭვქვეშ დააყენოს ამ დაპირების შესრულება.

ამასთან, მომხსენებლებმა მოუწოდეს ყველა დაინტერესებულ მხარეს, უზრუნველყონ ქალი კანდიდატების სათანადო წარმოდგენა მომავალი არჩევნების პროპორციულ და მაჟორიტარულ კომპონენტებში. სასამართლო სისტემის რეფორმასთან დაკავშირებით მომხსენებლები მიესალმებიან სასამართლო რეფორმების მეოთხე ტალღის მიღებას და იმედს გამოთქვამენ, რომ მათი განხორციელება დაუყოვნებლივ და თანმიმდევრულად მოხდება.

მომხსენებლები ხელისუფლებას მოუწოდებენ, გააგრძელონ მოსამართლეების დამოუკიდებლობის შემდგომი გაძლიერების გზები, მათ შორის იუსტიციის უმაღლესი საბჭოს ფუნქციონირებასთან დაკავშირებით.

თანამომხსენებლები ასევე მიესალმებიან მმართველი უმრავლესობის გადაწყვეტილებას, ამჟამინდელი საპარლამენტო სესიის დროს იუსტიციის უმაღლეს საბჭოში არ დანიშნონ დამატებითი მოსამართლეები. ისინი მოუწოდებენ ხელისუფლებას, დანიშნონ მოსამართლეები იუსტიციის უმაღლეს საბჭოში მხოლოდ მას შემდეგ, რაც დანიშვნის პროცედურების შესახებ ამჟამად მოქმედ კანონში შევა ცვლილებები წინა დანიშვნის ციკლში აღმოჩენილი ხარვეზების გამოსწორების მიზნით. გარდა ამისა, თანამომხსენებლები ასევე მოუწოდებენ ხელისუფლებას, გაითვალისწინონ ვენეციის კომისიის დანარჩენი რეკომენდაციები, კერძოდ ფარული კენჭისყრის გაუქმებასთან, დასაბუთებული გადაწყვეტილების მიღებასთან და შერჩევის ერთიანი და გამჭვირვალე კრიტერიუმების შემოღებასთან დაკავშირებით, რათა უზრუნველყოფილი იყოს დამსახურებებზე დაფუძნებული დანიშვნის პროცესი.

თანამომხსენებლები მოუწოდებენ ხელისუფლებას შეამცირონ წინასასამართლო დაკავების გამოყენება, რაც ჯერ კიდევ ხშირად ხდება და წინააღმდეგობაში მოდის ევროპულ სტანდარტებთან და აჩენს ეჭვს, რომ ისინი შეიძლება პოლიტიკური მოტივებით იყოს გამოყენებული.

ისინი მიესალმებიან ხელისუფლებისა და მმართველი უმრავლესობის მზაობას შემუშავდეს ადმინისტრაციული კანონდარღვევების შესახებ ახალი კანონი, რადგან მოქმედი კანონი ჯერ კიდევ საბჭოთა ეპოქაშია შექმნილი და ეწინააღმდეგება ევროპულ სტანდარტებს და საქართველოს კონსტიტუციის დებულებებს – იძლევა რა მისი ბოროტად გამოყენების შესაძლებლობას.

”კიდევ ერთხელ გვსურს განვაცხადოთ, არსებობს შესაძლებლობა, რომ შეიქმნას ახალი პოლიტიკური გარემო საქართველოს პოლიტიკურ ველზე, რაც ხელს შეუწყობს ამ რეფორმების განხორციელებას და რამაც შეიძლება ახალი იმპულსი მისცეს საქართველოს დემოკრატიულ კონსოლიდაციას, როგორც საქართველოს დიდი ხნის მეგობრები, ჩვენ მზად ვართ დავეხმაროთ ყველა დაინტერესებულ მხარეს ამ პროცესში“ - აცხადებენ თანამომხსენებლები.

შეგახსენებთ, ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.