საქართველოს ვიზალიბერალიზაციას ევროპარლამენტმა მხარი დაუჭირა.
კენჭისყრას წინ უძღოდა დებატები, სადაც ევროპარლამენტარებმა გამოთქვეს საკუთარი პოზიცია საქართველოსთვის ვიზალიბერალიზაციის მინიჭებაზე, ასევე იმ რეფორმებზე, რომელიც ქვეყანამ უვიზო მიმოსვლის მისაღებად გაატარა.
საქართველოსთვის ვიზალიბერალიზაციის მინიჭებას მხარი არ დაუჭირა 66 -მა დეპუტატმა, რომლებმაც უარის მიზეზად ევროპაში ორგანიზებული დანაშაულის გაზრდის საფრთხე დაასახელეს. 28-მ კი თავი შეიკავა.
ბიომეტრული პასპორტების მქონე საქართველოს მოქალაქეები შენგენის ზონის ქვეყნებში უვიზო მიმოსვლით 180 დღის განმავლობაში მაქსიმალური, 90 დღის ვადით ისარგებლებენ.
უვიზო რეჟიმი გულისხმობს თავისუფალ გადაადგილებას შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას და შენგენის 4 კანდიდატ ქვეყანას.
საქართველო-ევროკავშირს შორის მოლაპარაკებები ვიზალიბერალიზაციის საკითხზე 2012 წლის 4 ივნისს დაიწყო, 2013 წლის 25 თებერვალს კი, საქართველოს ხელისუფლებას სავიზო რეჟიმის ლიბერალიზაციის სამოქმედო გეგმა გადაეცა. აღნიშნული გეგმა შეიცავდა მოთხოვნებს, რომლებიც ქართულ მხარეს უვიზო რეჟიმის დაწესებისთვის უნდა შეესრულებინა.
2015 წლის დეკემბერში ევროკომისიამ დადებითად შეაფასა სამოქმედო გეგმის ფარგლებში საქართველოს მიერ აღებული ვალდებულებების შესრულება და დადებითი რეკომენდაცია გამოაქვეყნა, დღეს კი ევროპარლამენტმა საქართველოს ვიზალიბერალიზაციის საკითხი პლენარულ სესიაზე დადებითად გადაწყვიტა.
2017 წლის 2 თებერვალი ისტორიული დღედ იქცა საქართველოსთვის, რომელიც ამ მომენტს წლების განმავლობაში ელოდა. თუმცა ეს ჯერ კიდევ არ ნიშნავს რომ საქართველოს მოქალაქეები ხვალიდანვე შეძლებენ შენგენის ქვეყნებში უვიზოდ გამგზავრებას. დარჩენილია ტექნიკური პროცედურები. ვიზალიბერალიზაცია სავარაუდოდ 2017 წლის მარტიდან ამოქმედდება.
|
