‘რუსულ კანონს’, 150–მდე ორგანიზაცია, მედია და ფიზიკური პირი სტრასბურგის სასამართლოში ასაჩივრებს| borjomi.tv

ახალი ამბები

‘რუსულ კანონს’, 150–მდე ორგანიზაცია, მედია და ფიზიკური პირი სტრასბურგის სასამართლოში ასაჩივრებს

11:09 / 18.10.2024

ქართული ორგანიზაციები "უცხოური გავლენის გამჭვირვალობის შესახებ" კანონს ადამიანის უფლებათა ევროპულ სასამართლოში ასაჩივრებენ. მის მიერ გამოწვეულ მძიმე შედეგებს ადამიანის უფლებათა ევროპულ სასამართლოში, 16 მედია ორგანიზაციის, 120 სამოქალაქო საზოგადოების ორგანიზაციისა და 4 ფიზიკური პირის სახელით გაასაჩივრებს. ინფორმაციას „საერთაშორისო გამჭირვალობა–საქართველო“ ავრცელებს.

როგორც საია-ს ხელმძღვანელმა, ნონა ქურდოვანიძემ ბრიფინგზე განაცხადა, არასამთავრობო ორგანიზაციები აღნიშნული კანონის გამო უკვე უარყოფით შედეგებს იღებენ.

მისივე თქმით, თუ ევროპული სასამართლო კანონის მოქმედების ფარგლებში, ადამიანის უფლებების დარღვევას დაადგენს, სახელმწიფოს კანონის გადახედვა და გაუქმება მოუწევს.

„რუსული კანონი არა მხოლოდ სამოქალაქო საზოგადოებისა და მედიის შეზღუდვას ისახავს მიზნად, არამედ ყველა მოქალაქის ერთმანეთისგან გათიშვასა და კრიტიკული ხმის ჩახშობას ემსახურება. მომჩივანი ორგანიზაციები ისეთ საზოგადოებრივ პრობლემებზე მუშაობენ, როგორებიცაა: გარემოს დაცვა, შშმ პირთა დახმარება, ქალთა და ბავშვთა ძალადობისგან დაცვა, სასამართლოს რეფორმა, კორუფციასთან ბრძოლა, საგამოძიებო ჟურნალისტიკა და ა. შ.“,–ვკითხულობთ ორგანიზაციის განცხადებაში.

მომჩივნები ადამიანის უფლებათა ევროპული კონვენციით დაცული შეკრებისა და გაერთიანების თავისუფლების (მე-11 მუხლი), გამოხატვის თავისუფლების (მე-10 მუხლი), პირადი და ოჯახური ცხოვრების დაცულობის უფლების (მე-8 მუხლი), დისკრიმინაციის (მე-14 მუხლი), სამართლებრივი დაცვის ქმედითი საშუალებების უფლების (მე-13 მუხლი) და უფლებების შეზღუდვათა გამოყენების ფარგლების (მე-18 მუხლის) დარღვევებზე იდავებენ.

„დამოუკიდებელ ორგანიზაციებთან რუსული მეთოდებით ბრძოლა არა მხოლოდ ადამიანის ფუნდამენტურ უფლებებს ლახავს, არამედ ასევე, ძირს უთხრის ქართველი ხალხის ურყევ არჩევანს ევროატლანტიკურ სტრუქტურებში ინტეგრაციასთან დაკავშირებით. სამწუხაროა, რომ კონსტიტუციურ ვალდებულებას, რომელიც ყველა ამ ცივილიზაციური არჩევანის დაცვას სახელმწიფო ორგანოებს ავალდებულებს, სწორედ სახელისუფლებო ორგანოები არღვევენ, ხოლო, საკონსტიტუციო სასამართლო საკუთარი მოვალეობის შესრულებაზე უარს ამბობს.

საკონსტიტუციო სასამართლოს მიერ საკუთარი მოვალეობის შეუსრულებლობის მიუხედავად, ჩვენი ბრძოლა რუსული კანონის წინააღმდეგ გრძელდება და ის აუცილებლად ქართველი ხალხის უპირობო გამარჯვებით დასრულდება“,–აღნიშნავენ განცხადების ავტორები.

ცნობისთვის, 9 ოქტომბერს, საქართველოს საკონსტიტუციო სასამართლომ „რუსული კანონის“ შეჩერებასთან დაკავშირებით გადაწყვეტილება გამოაქვეყნა. სასამართლომ არ გაიზიარა მოსარჩელე მხარის არგუმენტები და „რუსული კანონის“ მოქმედება არ შეაჩერა.

სარჩელს საქართველოს პარლამენტის წინააღმდეგ, რომელიც „რუსული კანონის“ შესაჩერებლად და გასაუქმებლად არის შეტანილი საკონსტიტუციო სასამართლოში, საქართველოს პრეზიდენტი, საქართველოს პარლამენტის წევრები: თამარ კორძაია, ანა ნაცვლიშვილი, ლევან ბეჟაშვილი და სხვები (სულ 38 დეპუტატი), ა(ა)იპ „ინფორმაციის თავისუფლების განვითარების ინსტიტუტი“, ა(ა)იპ „უფლებები საქართველო“, ა(ა)იპ „სამოქალაქო საზოგადოების ფონდი“ და სხვები (სულ 122 მოსარჩელე), შპს „საინფორმაციო ცენტრების ქსელი“ და ა(ა)იპ „სტუდია მონიტორი“ წარმოადგენს.

ავტორი:

ნინო ვართაპეტიანი

ო

ს

ო

ხ

პ

შ

კ