სანქციები ივანიშვილს და უვიზო რეჟიმის გადახედვა – ევროპარლამენტის რეზოლუცია| borjomi.tv

ახალი ამბები

სანქციები ივანიშვილს და უვიზო რეჟიმის გადახედვა – ევროპარლამენტის რეზოლუცია

11:53 / 10.10.2024

495–მა ევროპარლამენტარმა მხარი დაუჭირა რეზოლუციას, რომელიც „ქართული ოცნების“ ხელისუფლების ანტიდასავლური პოლიტიკის, მათ შორის „რუსული კანონის“ გამო, ბიძინა ივანიშვილისთვის სანქციების დაუყოვნებლივ დაწესებას გულისხმობს. რეზოლუცია მოითხოვს საქართველოსთვის უვიზო რეჟიმის გადახედვასაც.

აღნიშნულ რეზოლუციას მხოლოდ 73–მა დეპუტატმა არ დაუჭირა მხარი, 86–მა დეპუტატმა კი ხმის მიცემისგან თავი შეიკავა.

რეზოლუცია ერთობლივად წარადგინეს და მხარი დაუჭირეს „ევროპის სახალხო პარტიამ“, „სოციალ-დემოკრატებმა“, „ევროპელმა კონსერვატორებმა და რეფორმისტებმა“, ასევე „ლიბერალებმა (RENEW)“ და „მწვანეებმა (Greens/EFA)“.

რეზოლუციის პროექტით, ევროპარლამენტი:

გამოხატავს ღრმა შეშფოთებას საქართველოში დემოკრატიული უკუსვლის გამო, რომელიც თვალსაჩინოდ განვითარდა მიმდინარე წლის განმავლობაში, განსაკუთრებით კი 2024 წლის 26 ოქტომბრის საპარლამენტო არჩევნების წინ; კატეგორიულად გმობს „უცხოური გავლენის გამჭვირვალობის შესახებ“ და „არასრულწლოვანთა ოჯახური ფასეულობებისა და დაცვის შესახებ“ კანონის მიღებას, ასევე, საარჩევნო კოდექსში შეტანილ ცვლილებებს; თვლის, რომ ზემოაღნიშნული არის ინსტრუმენტები, რომლებსაც მთავრობა იყენებს გამოხატვის თავისუფლების დარღვევის, მედიის ცენზურის, სამოქალაქო საზოგადოებისა და არასამთავრობო სექტორის კრიტიკულ ხმების დახშობისა და მოწყვლადი ადამიანების დისკრიმინაციის მიზნით; ხაზს უსვამს, რომ ზემოაღნიშნული ასევე შეუთავსებელია ევროკავშირის ღირებულებებთან და დემოკრატიულ პრინციპებთან, ეწინააღმდეგება საქართველოს ევროკავშირში გაწევრიანების ამბიციებს, ზიანს აყენებს საქართველოს საერთაშორისო რეპუტაციას და საფრთხეს უქმნის ქვეყნის ევროატლანტიკურ ინტეგრაციას; მტკიცედ ხაზს უსვამს, რომ თუ ზემოაღნიშნული კანონმდებლობა არ გაუქმდება, საქართველოს ევროკავშირთან ურთიერთობაში პროგრესი ვერ იქნება;

მოუწოდებს, საქართველოს მთავრობისთვის განკუთვნილი ყველა დაფინანსება გაიყინოს ზემოაღნიშნული არადემოკრატიული კანონების გაუქმებამდე და დაწესდეს მკაცრი პირობები საქართველოს მთავრობისთვის მომავალი დაფინანსების გაცემაზე;

გამოხატავს შეშფოთებას სიძულვილისა და დაშინების ატმოსფეროს გამო, რომელიც გამოწვეულია საქართველოს მთავრობის წარმომადგენლებისა და პოლიტიკური ლიდერების განცხადებებით, ასევე, ხელისუფლების მიერ პოლიტიკურ პლურალიზმზე თავდასხმებით; გმობს ოლიგარქ ბიძინა ივანიშვილისა და ხელისუფლების წამყვანი ფიგურების კომენტარებს, რომლებიც იმუქრებიან ოპოზიციური პარტიების აკრძალვით და ოპოზიციას „კრიმინალურ პოლიტიკურ ძალად“ მოიხსენიებენ; აღნიშნავს, რომ ასეთი დაშინება სერიოზულად ძირს უთხრის პოლიტიკურ პროცესს და გამოხატვის თავისუფლებას და ხელს უწყობს შიშის გარემოს შექმნას;

მოუწოდებს საქართველოს საგამოძიებო სამსახურს, საფუძვლიანად გამოიძიოს პოლიციელების სისასტიკე მომიტინგეების წინააღმდეგ გაზაფხულის საპროტესტო აქციების დროს;

კიდევ ერთხელ მოუწოდებს კომისიას, დროულად შეაფასოს, როგორ აისახება „უცხოური გავლენის გამჭვირვალობის“ და „ოჯახური ღირებულებების და არასრულწლოვანთა დაცვის შესახებ“ კანონები, გენდერული კვოტების გაუქმება და სხვა ცვლილებები საარჩევნო კანონმდებლობაში, ვენეციის კომისიის რეკომენდაციების შესრულება ზოგადად და არჩევნების საერთაშორისო სტანდარტების შესაბამისად ჩატარება საქართველოს მიერ ვიზალიბერალიზაციის კრიტერიუმების უწყვეტ შესრულებაზე, კერძოდ, ფუნდამენტური უფლებების კრიტერიუმზე, რომელიც ევროკავშირის ვიზალიბერალიზაციის პოლიტიკის გადამწყვეტი კომპონენტია;

იმეორებს ურყევ მხარდაჭერას ქართველი ხალხის ლეგიტიმური ევროპული მისწრაფებებისადმი. ხაზს უსვამს, რომ საქართველოსთვის კანდიდატის სტატუსის მინიჭება მოტივირებული იყო სამოქალაქო საზოგადოების მიღწევებისა და დემოკრატიული ძალისხმევის აღიარების სურვილით, ისევე როგორც მის მოქალაქეებში ევროკავშირში გაწევრიანების აბსოლუტური მხარდაჭერით; აფასებს საქართველოს პრეზიდენტის სალომე ზურაბიშვილის ძალისხმევას, დააბრუნოს ქვეყანა განვითარების დემოკრატიულ და პროევროპულ გზაზე;

გმობს ოლიგარქ ბიძინა ივანიშვილის პირად როლს მიმდინარე პოლიტიკურ კრიზისში და რუსეთისკენ შებრუნების სასარგებლოდ ქვეყნის ევროატლანტიკური ორიენტაციის შელახვის კიდევ ერთ მცდელობაში. იმეორებს თავის მოწოდებას საბჭოსა და ევროკავშირის დემოკრატიული პარტნიორებისადმი, რომ დაუყოვნებელი და მიზანმიმართული პერსონალური სანქციები დაუწესონ ივანიშვილს საქართველოში პოლიტიკური პროცესის გაუარესებაში მისი როლის გამო;

მოუწოდებს ევროკავშირს და მის წევრ ქვეყნებს, დააწესონ პერსონალური სანქციები ყველა იმ პირზე, ვინც პასუხისმგებელია საქართველოში დემოკრატიის შელახვაზე, რომლებიც მონაწილეობენ პოლიტიკური ოპონენტების და მშვიდობიანი მომიტინგეების ძალადობაში და ავრცელებენ ანტიდასავლურ დეზინფორმაციას; მიესალმება აშშ-ის მიერ „ქართული ოცნების“ მაღალჩინოსნების მიმართ დაწესებულ პირად სანქციებს;
გამოთქვამს შეშფოთებას იმის გამო, რომ საქართველოს პარლამენტში ქართული ოცნების უმრავლესობის მიერ მიღებული ბევრი საკანონმდებლო წინადადება ღალატობს ქართველი ხალხის დიდი უმრავლესობის მისწრაფებებს, იცხოვროს დემოკრატიულ საზოგადოებაში, გააგრძელოს დემოკრატიული და კანონის უზენაესობის რეფორმები, განაგრძოს მჭიდრო თანამშრომლობა ევროატლანტიკურ პარტნიორებთან და ვალდებულებას, მიაღწიონ ევროკავშირში გაწევრიანების გზას;

ხაზს უსვამს, რომ გამოხატვისა და შეკრების თავისუფლება ფუნდამენტური უფლებაა და დაცული უნდა იყოს ნებისმიერ ვითარებაში, განსაკუთრებით ქვეყანაში, რომელსაც სურს ევროკავშირში გაწევრიანება;

ხაზს უსვამს, რომ საზოგადოებრივი დამკვირვებლის როლი, რომელსაც სამოქალაქო საზოგადოება და დამოუკიდებელი მედია ასრულებს, არსებითია დემოკრატიული საზოგადოებისთვის და გადამწყვეტია ევროკავშირში გაწევრიანებასთან დაკავშირებული რეფორმების წინსვლისთვის. შესაბამისად, მოუწოდებს საქართველოს ხელისუფლებას, ყველაფერი გააკეთოს მათთვის ხელსაყრელი გარემოს უზრუნველსაყოფად.

იხსენებს, რომ 2023 წლის 14-15 დეკემბრის ევროპულმა საბჭომ მიანიჭა საქართველოს კანდიდატი ქვეყნის სტატუსი იმ გაგებით, რომ გადაიდგმება შესაბამისი 9 ნაბიჯი. ახლახან მიღებული კანონმდებლობა აშკარად ეწინააღმდეგება ამ ამბიციას და ფაქტობრივად შეაჩერა საქართველოს ევროკავშირში ინტეგრაცია;

მოუწოდებს საქართველოს ხელისუფლებას, უზრუნველყოს, რომ 2024 წლის ოქტომბრის საპარლამენტო არჩევნები შეესაბამებოდეს უმაღლეს საერთაშორისო სტანდარტებს, გარანტირებული იყოს გამჭვირვალე, თავისუფალი და სამართლიანი პროცესი. ითხოვს მმართველი პარტიის სასარგებლოდ საჯარო რესურსებისა და ადმინისტრაციული შესაძლებლობების ბოროტად გამოყენების ფესვგადგმული პრაქტიკის გაუქმებას; მოუწოდებს საქართველოს ხელისუფლებას, მიიღოს ყველა საჭირო ზომა, რათა უზრუნველყოს, რომ არჩევნების დაკვირვებაში ჩართული ყველა პატივცემული სამოქალაქო საზოგადოების ორგანიზაციამ შეძლოს დაკვირვება დაბრკოლების გარეშე;

შეშფოთებას გამოხატავს საზღვარგარეთ მხოლოდ შეზღუდული რაოდენობის საარჩევნო უბნების გახსნის გადაწყვეტილებაზე, მიუხედავად ქართული დიასპორის არაერთი მოთხოვნისა, რითაც საზღვარგარეთ მცხოვრებ ქართველთა უმრავლესობას ართმევს ხმის მიცემის უფლებას;
აღნიშნავს, რომ მნიშვნელოვანი საერთაშორისო გამოხმაურების ფონზე, რომელიც ეჭვქვეშ აყენებს მოახლოებული არჩევნების ლეგიტიმურობას, საქართველოს პრემიერ-მინისტრმა „რეკომენდაცია გაუწია“, რომ ანტიკორუფციულ ბიუროს გაეუქმებინა 2024 წლის 24 სექტემბრის გადაწყვეტილება „საერთაშორისო გამჭვირვალობა – საქართველოსთან“ დაკავშირებით.

გმობს „ქართული ოცნების“ მიერ უკრაინის ომის ძალადობრივი სურათების გამოყენებას, როგორც მოსაზრებების მანიპულირებისა და დეზინფორმაციის, პრორუსული და ანტიუკრაინული განწყობების გავრცელების საშუალებას მის კამპანიაში;

მოელის, რომ „ქართული ოცნება“ პატივს სცემს ქართველი ხალხის ნებას და თავისუფალ არჩევანს მომავალ საპარლამენტო არჩევნებზე და უზრუნველყოფს ხელისუფლების მშვიდობიან გადაცემას;

მტკიცედ სწამს, რომ მოახლოებული არჩევნები გადამწყვეტი იქნება საქართველოს მომავალი დემოკრატიული განვითარებისა და გეოპოლიტიკური არჩევანის განსაზღვრაში, ისევე როგორც მის პროგრესში. აღიარებს, რომ ჯერ კიდევ შესაძლებელია საქართველოს, როგორც ევროკავშირის კანდიდატი ქვეყნის, დემოკრატიული მომავლის კონსოლიდაცია ახალგაზრდა ლიდერების თაობით, რაც გამოვლინდა სპონტანური პროტესტით „უცხოური აგენტების“ კანონის წინააღმდეგ;

გამოხატავს ღრმა შეშფოთებას საქართველოში რუსეთის გაზრდილი გავლენის გამო, მათ შორის რუსეთიდან გაზრდილი იმიგრაციის გამო, რუსეთთან გაზრდილი სავაჭრო კავშირებისა და საქართველოს მზადყოფნისთვის, განაგრძოს რუსეთთან შერიგება უკრაინაში რუსეთის ომისა და საქართველოს სუვერენული ტერიტორიის მეხუთედის ოკუპაციის მიუხედავად; მოუწოდებს საქართველოს მთავრობას დააწესოს სანქციები რუსეთის წინააღმდეგ უკრაინასთან აგრესიული ომის საპასუხოდ, გააგრძელოს ოკუპირებული ტერიტორიების არაღიარების წინა პოლიტიკა და პატივი სცეს მის ვალდებულებას, განახორციელოს ეფექტური ზომები ევროპული სანქციების გვერდის ავლის თავიდან ასაცილებლად; მოუწოდებს საქართველოს მთავრობას, სრულად შეუერთდეს ევროკავშირის საგარეო პოლიტიკას და ევროკავშირის სტრატეგიას რუსეთის მიმართ;

მტკიცედ იმეორებს თავის მოთხოვნას ყოფილი პრეზიდენტის მიხეილ სააკაშვილის საზღვარგარეთ სამკურნალოდ, ჰუმანიტარული ნიშნით უპირობოდ გათავისუფლების შესახებ.

აღნიშნავს, რომ საქართველოს მთავრობამ კიდევ უფრო გააუარესა ხელმისაწვდომობა საჯარო ინფორმაციაზე, მათ შორის საბჭოთა პერიოდის არქივებზე, გამოიყენა ევროკავშირის მონაცემთა დაცვის ზოგადი რეგულაცია არქივზე წვდომის დრაკონული შეზღუდვების ცრუ დასაბუთებისთვის. წუხს სტალინის კულტის და მასთან დაკავშირებული საბჭოთა ნოსტალგიის ზრდის გამო საქართველოში, რასაც მხარს უჭერს მმართველი მთავრობა, რაც ხაზს უსვამს მის მჭიდრო კავშირს რუსეთთან.

ავტორი:

ნინო ვართაპეტიანი