ტელეკომპანია „ბორჯომს“ მიაწოდეს ინფორმაცია, რომ ქვეყანაში შექმნილი მდგომარეობის გამო, ერთ-ერთ მაღალი კლასის სასტუმროში დაახლოებით 10 თანამშრომელი სავარაუდოდ გაათავისუფლეს და ხელშეკრულება არ გაუგრძელეს. ამ ადამიანებმა სატელევიზიო კომენტარის გაკეთებისგან ამ ეტაპზე თავი შეიკავეს, გვითხრეს რომ არიან გაურკვევლობაში და იმედი აქვთ რომ მუშაობას კვლავ განაახლებენ.

ერთ-ერთ სასტუმროდან სამსახურის გარეშე დარჩენილმა, რომელიც თავდაპირველად გადაღებაზე დაგვთანხმდა და ინტერვიუც ჩაგვიწერა, მოგვიანებით დაგვიკავშირდა და მასალის ეთერში გაშვებაზე უარი გვითხრა. ინტერვიუში თავად ამბობდა, რომ სასტუმროს დამსაქმებელი მათ ჰპირდებოდა, რომ სანამ მუშაობას განაახლებდნენ 200 ლარს გადაუხდიდა, თუმცა სრულიად უხელფასოდ და შემოსავლის წყაროს გარეშე დარჩა თავადაც და მისი ოჯახიც.

ტელეკომპანია „ბორჯომი“ ასევე ესაუბრა სასტუმრო ქრაუნ პლაზას მენეჯერს, რომელმაც სატელევიზიო კომენტარის გაკეთებისგან თავი შეიკავა, პირად საუბარში კი გვითხრა რომ მთავრობის სამოქმედო გეგმას ელიან და ამის შემდეგ ეცოდინებათ თავიანთი სამომავლო პერსპექტივა. მენეჯერის განცხადებით, მათი თანამშრომლები შვებულებაში არიან გაშვებული, თუმცა იღებენ ანაზღაურების 50%-ს. როგორ მოიქცევიან მაისიდან, მათთვისაც უცნობია.

ასევე დავუკავშირდით, მეორე 5 ვარსკვლავიანი სასტუმროს ადმინისტრაციას, თუმცა მათ ინტერვიუ არ ჩაწერეს და არც ჩვენს კითხვებზე გაგვცეს პასუხი.

ბორჯომის მსგავსად, თითქმის იგივე რეალობაა ბაკურიანშიც. დაბაში ერთ-ერთი მაღალი კლასის სასტუმროს ყოფილმა თანამშრომელმა გვითხრა რომ დამსაქმებელმა მათ უფასო შვებულებებში გასვლა შესთავაზა, მან კი სამსახურის დატოვების გადაწყვეტილება მიიღო.

ტელეკომპანია „ბორჯომს“ დღეს კომენტარის გაკეთებაზე ბევრმა რესპონდენტმა უთხრა უარი. სიუჟეტში შეგიძლიათ გაიგოთ იმ ადამიანების მოსაზრებები, რომლებმაც ამ თემაზე ღიად ისაუბრეს.