ქართული ოცნების აღმასრულებელი მდივანი დღეს გამართულ ბრიფინგზე, ენზელ მკოიანთან დაკავშირებულ კითხვას უპასუხა. ირაკლი კობახიძის თქმით, ნინოწმინდა-ახალქალაქის მაჟორიტარმა დეპუტატმა თავდაცვის მიზნით გაისროლა. კობახიძე განმარტავს, რომ დეტალებს გამოძიება დაადგენს, თუმცა ამ ეტაპზე მათი თანაგუნდელის დაკავების ან მისთვის უფლებამოსილების შეწყვეტის ვერანაირ საფუძველს ვერ ხედავს.

„ნამდვილად არსებობს ის კადრები, სადაც ნათლად ჩანს, რომ სამველ პეტროსიანი ისვრის ენზელ მკოიანის, სახელმწიფო პოლიტიკური თანამდებობის პირის, საქართველოს პარლამენტის წევრის მისამართით და ამაზე პასუხობს მკოიანიც, თავდაცვის მიზნით. ეს არის ის სურათი, რომელიც აშკარად იკვეთება ვიდეო კადრებიდან, დანარჩენი არის გამოძიების საქმე. პირდაპირ და ნათლად ჩანს ამ ვიდეო კადრებში ის, რომ კონფლიქტის ინიცატორი არის პეტროსიანი, მკოიანმა ისროლა თავდაცვის მიზნით., ამიტომ მისი დაკავების ან უფლებამოსილების შეწყვეტის ვერანაირ საფუძველს ვერ ვხედავ" - განაცხადა ირაკლი კობახიძემ.

მედიის კითხვაზე - არის თუ არა ეს შერჩევითი სამართალი, კობახიძემ უპასუხა:

„მე რომ თქვენ გესროლოთ და თქვენ მიპასუხოთ სროლით, თქვენ არავინ უნდა დაგაკავოთ. ეს არის არაშერჩევითი სამართალი“.

კობახიძის განცხადებით, საბოლოო გადაწყვეტილებას ამ საკითხზე სასამართლო მიიღებს.

შეგახსენებთ, ახალქალაქში სროლა 26 მარტს მოხდა. საქმეზე გამოძიება ორი მუხლით აღიძრა. ენზელ მკოიანმა განაცხადა, რომ "პატრიოტთა ალიანსის" წევრმა ცეცხლსასროლი იარაღით ჩემი მოკვლა სცადა.
ახალქალაქში მომხდარი ხულიგნობისა და სროლის ფაქტზე აღკვეთის ღონისძიების სახით პატიმრობა ორ პირს „პატრიოტთა ალიანსის“ წევრს სამველ პეტროსიანს და ენზელ მკოიანის 19 წლის ძმიშვილს არმენ მკოიანს შეეფარდა.

მოგვიანებით, "ქართული ოცნების" დეპუტატმა, ენზელ მკოიანმა საკუთარ ფეისბუქის გვერდზე სროლის ამსახველი ვიდეო გამოაქვეყნა.