"მოლაპარაკება არ დაგვიმთავრებია" - გახარიასა და ხაზარაძეს შორის შეხვედრა დასრულდა

ახალი ამბები

19:14 / 17.09.2024

ორბელიანების სასახლეში პრეზიდენტ სალომე ზურაბიშვილის ინიციატივით დასრულდა ოპოზიციური პარტიების „გახარია საქართველოსთვისა“ და „ძლიერი საქართველო-ლელო, ხალხისთვის, თავისუფლებისთვის!“ ლიდერების, გიორგი გახარიასა და მამუკა ხაზარაძეს შორის შეხვედრა.

შეხვედრის შემდეგ ხაზარაძემ თქვა, რომ მოლაპარაკება არ დასრულებულა და მათ პაუზა აიღეს. ხაზარაძემ მადლობა გადაუხადა პრეზიდენტ სალომე ზურაბიშვილსა და გიორგი გახარიას.

„გახარიას პირისპირ შევხვდი, ვისაუბრეთ წარსულსა და მომავალზე. ქვეყანა არის გზაგასაყარზე, ჩვენს ქვეყანას ემუქრება ძალიან სერიოზული პრობლემა და საშიშროება, ეს არის ან რუსული არჩევანი, ან ჩვენი თავისუფლების არჩევანი, ევროპული არჩევანი. ამ თემაზე ვისაუბრეთ, აქედან გამომდინარე, რა თქმა უნდა, ბევრ საკითხთან დაკავშირებით, მიუხედავად ჩვენი აზრთა სხვადასხვაობისა, შევთანხმდით ერთ რამეზე, რომ გავაკეთებთ ყველაფერს იმისათვის, რომ გავაკეთოთ სრული მობილიზაცია, რომ „ქართული ოცნება“, ბიძინა ივანიშვილის ხელმძღვანელობით გავუშვათ ხელისუფლებიდან. რა თქმა უნდა, ძალიან სწრაფად ქვეყანა დავაყენოთ ევროპული განვითარების გზაზე. ჩვენ მოლაპარაკება არ დაგვიმთავრებია, არის საკითხები, ტექნიკური ტიპის საკითხები, ჩვენ ავიღეთ კიდევ პაუზა, ვისაუბრებთ“, - აღნიშნა მამუკა ხაზარაძემ.

საპასუხოდ, გიორგი გახარიამ შეხვედრისთვის ხაზარაძეს მადლობა გადაუხადა. ამასთან, აღნიშნა, რომ სწორედ, მამუკა ხაზარაძემ ითხოვა ერთდღიანი პაუზა მოლაპარაკების გასაგრძელებლად.

„მადლობა ხაზარაძეს რომ როგორც იქნა, ეს საუბარი შედგა. არ მინდა მე დეტალებზე ვისაუბრო, შემიძლია, გითხრათ, რომ ჩვენი მხრიდან ყველაფერი ნათელია, პოზიცია დაფიქსირებულია, არაფერი საიდუმლო არ არის - ხაზარაძემ ითხოვა რაღაც დრო იმიტომ, რომ როგორც ჩანს, მას შესათანხმებელი აქვს პოზიციები. ეს არის, რის გამოც ეს გადაიდო, თორემ ჩემი მხრიდან არაფერი... ხაზარაძემ ითხოვა კიდევ ერთი დღე“, - თქვა გიორგი გახარიამ.

საქართველოს ყოფილმა პრემიერ-მინისტრმა თქვა, რომ ხაზარაძესა და მის გუნდზე არის დამოკიდებული მოლაპარაკების შედეგები.

„ბევრი ადამიანი იქნება მამუკა ხაზარაძის გუნდში, რომელიც გახარიას დაუძახებს თვალთხარიას და ბევრი ადამიანია ჩვენს გუნდში, რომელიც ხაზარაძეს დაუძახებს მევახშეს, და მერე რა, ამის გამო ჩვენ ის, რაც ქვეყნისთვის მნიშვნელოვანია, უნდა გადავდოთ?! მე ასე არ ვფიქრობ. ამ წინააღმდეგობების დაძლევა არის ის, რასაც ჰქვია ნამდვილი დემოკრატიული კონსენსუსი... თავიდან ბოლომდე ხაზარაძესა და მის გუნდზეა დამოკიდებული, რა მოხდება“, - განაცხადა გიორგი გახარიამ.

პრეზიდენტმა სალომე ზურაბიშვილმა საპარლამენტო არჩევნების წინ ერთ საარჩევნო სუბიექტად გაერთიანებისკენ მოუწოდა გიორგი გახარიას და მამუკა ხაზარაძის პარტიებს.

„გადაწყვეტილება ორი პროევროპული ძალის ("ძლიერი საქართველოს" და "გახარია საქართველოსთვის") ხელშია. ვიმედოვნებ, რომ ქვეყნის ესოდენ მნიშვნელოვან მომენტში შეძლებენ გადადგან ის ნაბიჯი, რომელიც ამომრჩეველს მეტ სიცხადეს, მეტ გარკვეულობას და მეტი ძალის განცდას მისცემს.

ნაბიჯი, რომელიც ასევე დაარწმუნებს ამომრჩეველს, რომ შეუძლიათ პოლიტიკურ პარტიებს ქვეყნის გადარჩენის გულისთვის ბევრი რამ დათმონ და უმნიშვნელოვანესი როლი ითამაშონ ევროპული მომავლის გადარჩენაში, რასაც არავინ დაუვიწყებს მათ“, - თქვა პრეზიდენტმა 16 სექტემბერს.

მამუკა ხაზარაძე პოლიტიკაში წავიდა 2019 წელს, როცა პროკურატურაში მის წინააღმდეგ საქმე აღიძრა ე.წ. ფულის გათეთრებაზე. ხაზარაძე ამბობდა, რომ გიორგი გახარიამ შინაგან საქმეთა მინისტრის თანამდებობაზე მუშაობის დროს, 2018 წლის საპრეზიდენტო არჩევნების მეორე ტურის წინ მას მუქარის შემცველი წერილი გაუგზავნა. ხაზარაძე ამტკიცებდა, რომ მისგან მოითხოვდნენ საჯაროდ დაეგმო „ნაციონალური მოძრაობა“ და ელაპარაკა, როგორ ექცეოდა ეს პარტია ბიზნესს ხელისუფლებაში ყოფნის დროს. გახარია წერილის გაგზავნის ფაქტს უარყოფს.

მომდევნო საპარლამენტო არჩევნები საქართველოში 26 ოქტომბერს გაიმართება. იმისთვის, რომ ოპოზიციური ამომრჩევლის ხმები არ დაიკარგოს, პარტიების ნაწილმა არჩევნებში ერთიანი სიით მონაწილეობა გადაწყვიტა. ამ საკითხზე მოლაპარაკებები გაიმართა „ლელოსა“ და „საქართველოსთვის“ შორისაც, თუმცა ამ დრომდე შეთანხმება ვერ შედგა.

ავტორი:

ნინო ვართაპეტიანი