პარიზის „ოქროს დიდი პრიზის“ ტრიუმფატორი, 4 მეტოქის მძლეველი რევაზ ლაშხი

ქართველმა მოჭიდავეებმა დიდი წარმატებით იასპარეზეს პარიზში გამართულ „ოქროს დიდ პრიზზე": თავისუფალთა ნაკრებმა ტურნირი 2 ოქროს და ბრინჯაოს მედლით დაასრულა, ბერძნულ-რომაული სტილით მოჭიდავეთა ნაკრებმა კი 4 ოქრო და 3 ბრინჯაოს მედალი მოიპოვა.

თავისუფალი სტილით მოჭიდავეებიდან ჩემპიონები გახდნენ ზვიად მეტრეველი (97კგ წონითი კატეგორია) და გიორგი მეშვილდიშვილი (125კგ), იოსებ ხუციშვილმა კი მესამე ადგილი დაიკავა. რაც შეეხება ბერძნულ-რომაული სტილით მოჭიდავეთა გუნდს, რევაზ ლაშხმა (66კგ), ზურაბ დათუნაშვილმა (75კგ), გიორგი ცირეკიძემ (80კგ) და იაკობ ქაჯაიამ (130კგ) ოქროს მედლები მოიპოვეს, ლაშა გოგიტაძე (59კგ), მანუჩარ ცხადაია (75კგ) და ვასილ იმერლიშვილი (85კგ) კი მესამე ადგილზე გავიდნენ.

განსაკუთრებით შთამბეჭდავად იჭიდავეს ლონდონის ოლიმპიადის ვერცხლისმედალოსანმა რევაზ ლაშხმა, გიორგი ცირეკიძემ და იაკობ ქაჯაიამ. ლაშხმა ზედიზედ სძლია ფრანგ ტარიკ ბელმადანის (3:0), პოლონელ ედგარ მელკუმოვს (5:0), იაპონელ კომა ტაკის (10:0), ფინალში კი მეორე პოლონელი გჟეგოჟ ვანკე დაამარცხა - 5:0. ცირეკიძემ დიდი უპირატესობით სძლია სერბ დრაგუტინ დუკიჩს (6:0), ლიტველ იულიუს მატუზევიჩიუსს (7:0) და პოლონელ ტადეუშ მიხალიკს (9:1), ქაჯაიამ კი იაპონელ შოთა სეგავასთან, ფრანგ იანიკ სზცზეპანეკთან და ლიტველ მიზგაიტის მინდაუგასთან 19 ქულა დააგროვა, თავად კი ერთიც არ დაუკარგავს.

წყარო: საქართველოს სპორტისა და ახალგაზრდობის საქმეთა სამინისტრო