სოფელ საკირეში მეწყერის გააქტიურებას ადგილობრივები შიშით ხვდებიან. იმატებს დაზიანებული სახლების რაოდენობა.

ივნისში მოსულმა სტიქიამ საკირეში არსებული ცენტრალური სამანქანო გზაც დააზიანა. არსებობს საფრთხე, რომ სოფლების - საკირის, დგვარისა და ტაძრისის ქალაქთან დამაკვშირებელი გზა მთლიანად მოწყდეს. მოსახლეობა შველას ითხოვს.

ანა თავაძე, დეკემბერში შვილს ელოდება. ამბობს, რომ ახალშობილისთვის საცხოვრებელი პირობები აქ შესაფერისი არ არის. მან და მისმა მეუღლემ მეზობლის სახლს თავი 5 თვის წინ შეაფარეს.



"აქ დროებით ვართ. მეპატრონე რომ დაბრუნდება, ქუჩაში ღია ცის ქვეშ ვრჩებით" - ამბობს ჩვენთან საუბრისას სოფელ საკირეში მცხოვრები - ანა თავაძე.

ანა თავაძე მეუღლესთან და მის ოჯახთან ერთად, ამ სახლში ცხოვრობდა. შენობა მეწყერმა მთლიანად დააზიანა.



გურეშიძეების ოჯახის რძალი ამბობს, რომ ბოლო 2 თვის განმავლობაში არაერთი დაპირების მიუხედავად პრობლემა დღემდე მოუგვარებელია.

"შუაზე იხლიჩება სახლი, გვეუბნებიან დღეს, ხვალ მოვაგვარებთ პრობლემასო და აღარ დაადგა საშველი. სამშენებლო მასალა ან ფულადი დახმარება მოგვცენ"- აცხადებს ანა თავაძე.

გურეშიძეების მსგავსად ეს პრობლემა აწუხებს მეზობლად მცხოვრებ ბლიაძეების ოჯახსაც. ისინი დახმარების მოლოდინში არიან.



ივნისში, მეწყერმა საცხოვრებელ სახლებთან ერთად ის ცენტრალური სამანქანო გზაც დააზიანა, რომელიც საკირის, ტაძრისის და დგვარის მოსახლეობას ქალაქთან აკავშირებს.





"მანქანა სულ იგრიხება, დაიბზარა და გატყდა ყველაფერი. ტკიცინ-ტკიცინი გაუდის მანქანას ამ გზაზე რომ გადმოდის. შეიძლება ხვალ, ზეგ ვეღარც გავიაროთ"- აცხადებს საკირის ავტობუსის მძღოლი - ნოდარ ფერაძე.

ადგილობრივი ხელისუფლება აცხადებს, რომ მეწყერსაშიში ადგილი გარემოს ეროვნული სააგენტოს სპეციალისტებმა შეისწავლეს, მათი დასკვნით გზის დაზიანების მიზეზი გრუნტი წყლებია და სოფლის ეს ტერიტორია სასწრაფო შველას საჭიროებს. პრობლემის მოგვარებას ბორჯომის მუნიციპალიტეტი, მოსახლეობას უმოკლეს ვადებში ჰპირდება, თუმცა ზუსტი თარიღი და სარეაბილიტაციო ხარჯები მათთვისაც უცნობია.



"შევეცდებით ის დაზარალებული ოჯახი ალტერნატიული ფართით დავაკმაყოფილოთ. რაც შეეხება გზას, სანამ პროექტი მზად არ იქნება, იქამდე ვერაფერს გავაკეთებთ" - განაცხადა ბორჯომის მუნიციპალიტეტის გამგებლის მოადგილემ - ვახტანგ ოჩხიკიძემ.