„საგზაო მოძრაობის შესახებ“ კანონში დაგეგმილი ცვლილება მარჯვენასაჭიანი და საჭეგადატანილი მანქანების რეგისტრაციის აკრძალვას და მართვის მოწმობებზე ქულათა სისტემის დაწესებას ითვალისწინებს. ამის შესახებ საქართველოს შინაგან საქმეთა მინისტრის მოადგილემ, შალვა ხუციშვილმა პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე განაცხადა.

კომიტეტის სხდომაზე, სადაც მოწვეული იყვნენ არასამთავრობო ორგანიზაციების და იმპორტიორი ბიზნესის წარმომადგენლები, განსაკუთრებული ვნებათღელვა გამოიწვია მარჯვენასაჭიანი მანქანების თემამ, რაზეც მინისტრის მოადგილემ განმარტა, რომ ქვეყანაში უკვე არსებული მანქანების მფლობელებს არ შეექმნებათ პრობლემა. შეზღუდვები შეეხება მარჯვენასაჭიანი ავტომობილების შემოყვანას. ასევე მიდგომა დაბალანსებული იქნება საექსპორტო შემთხვევაშიც. მომხსენებელმა იმ რისკებზე ისაუბრა, რასაც უკვე მომრავლებულ მარჯვენასაჭიანი სატრანსპორტო საშუალებები ქმნიან გზებზე მოძრაობის დროს. მან აქვე ისიც განმარტა, რომ ამ ცვლილებების ასამოქმედებლად მოცემული იქნება გონივრული ვადა, რომ იმპორტიორები არ დაზარალდნენ.

გარდა ამისა, საკანონმდებლო პაკეტით მნიშვნელოვნად იზრდება აქციზის გადასახადი 9 წელზე მეტი ასაკის ავტომობილებისთვის, ხოლო 3-დან 6-წლამდე ასაკის ავტომობილები შეღავათიანი დაბეგვრის რეჟიმში მოექცევიან.

ხანგრძლივი განხილვის შემდეგ კომიტეტის თავმჯდომარემ, ზურაბ ტყემალაძემ განაცხადა, რომ საკითხზე კიდევ იმსჯელებენ წამყვან კომიტეტებთან ერთად, სადაც გამოთქმული შენიშვნები შეჯერდება, დაიხვეწება და მხოლოდ ამის შემდეგ გავა კანონპროექტი პირველი მოსმენით პლენარულ სხდომაზე განსახილველად. ამ წინადადებას კომიტეტის წევრებმა მხარი დაუჭირეს.