ნინოწმინდაში მომხდარ მკვლელობასა და ყაჩაღურ თავდასხმაში ბრალდებულებს ახალციხის რაიონულმა სასამართლომ აღკვეთის ღონისძიება შეუფარდა.

ექვსი ბრალდებულიდან ერთ მათგანს დარიკო შ–ს 5 000 ლარიანი გირაო, ხოლო 5 პირს პატიმრობა შეეფარდა.

საქმის პროკურორი ვასილ ოსაძე ექვსივე პირის აღკვეთის ღონისძიებად პატიმრობას შეფარდებას მოთხოვდა.

პროკურატურის მტკიცებით, ბრალდებულები ტყემლანის მკვიდრის ქეთევან ხმალაძის სახლში შეკრიბნენ და ნინოწმინდაში ფულის გატაცემის მიზნით, ერთ–ერთ ოჯახზე ყაჩაღური თავდასხმა დაგეგმეს. გეგმის სისრულეში მოყვანა კი 13 იანვარს ღამით გადაწყვიტეს. ოჯახის დიასახლისს კარი მოტყუებით გააღებინეს და რძალ–დედამთილს ფული და ძვირფასეულობა მოსთხოვეს. 78 წლის ქალბატონმა ბრალდებულებს წინააღმდეგობა გაუწია, რის გამოც ერთ–ერთმა მათგანმა ყელის არეში დანით მრავლობითი ჭრილობები მიაყენა. ქალბატონი ადგილზე გარდაიცვალა, ბრალდებულები კი მიიმალნენ.

აღნიშნულთან დაკავშირებით ექვსი პირი სამართალდამცველებმა სოფელ ტყემლანაში დააკავეს. დაკავებულთაგან ახალციხის მუნიციპალიტეტის მკვიდრი მხოლოდ ერთი – ქეთევან ხმალაძეა. დანარჩენი ბრალდებულები ფოთიდან, ურეკიდან, ნინოწმინდიდან და ხულოდან არიან.

სხდომაზე ექვსი ბრალდებულიდან ადვოკატები მხოლოდ სამი მათგანის უფლებებს იცავდნენ. დანარჩენმა სამმა თემურ ბ–მ, ივანე გ–მ და კობა შ–მ პროკურორის შუამდგომლობაზე – მათ სახაზინო ადვოკატი დანიშნოდათ, უარი თქვეს.

გამოძიება დანაშაულის შეუტყობინებას ედავება ერთ–ერთ ბრალდებულს, ფოთში მცხოვრებ დარიკო შ–ს. პროკურატურა ირწმუნება, რომ დანაშაულის დაგეგმვისა და შემდგომ განვითარებული მოვლენების შესახებ, მან ყველაფერი იცოდა. გარდა ამისა, პროკურორის მტკიცებით, დარიკომ  ბრალდებულებს ავტომობილში საწვავიც ჩაუსხა.  შავაძის ადვოკატის თქმით კი ბრალეულობა ჯერ სხვა პირებს უნდა დაუმტკიცდეს და მხოლოდ ამის შემდეგ იმსჯელონ მისი დაცვის ქვეშ მყოფის დანაშაულზე.

რაც შეეხება არასამთავრობო ორგანიზაცია “ერთსულოვნება სამართლიანობიკენ” ხელმძღვანელს ქეთევანს ხმალაძეს, მის უფლებებს ადვოკატი ირაკლი ბარძიმაძე იცავს.  უფლებადამცველი მისი დაცვის ქვეშ მყოფის 20 000 ლარიანი გიორაოს სანაცვლოდ გათავისუფლებას მოითხოვდა. ადვოკატის მტკიცებით, ხმალაძე გამოძიებასთან დაკავების დღიდან თანამშრომლობს.

სასამართლო პროცესს მოსამართლე ნათია მერაბიშვილი უძღვებოდა.

შემდეგი სასამართლო სხდომა მიმდინარე წლის 16 მარტს 6 საათზე ჩაინიშნა.

შეგახსენებთ, რომ გამოძიება ჯგუფურად ჩადენილი ყაჩაღობის, განზრახ მკვლელობისა და დანაშაულის შეუტყობინებლობის ფაქტზე მიმდინარეობს (საქართველოს სსკ-ის 179-ე მუხლის მე-2 ნაწილის „ბ“ ქვეპუნქტით, 108-ე და 376-ე მუხლებით).

წყარო: ტელეკომპანია "მეცხრე არხი"