ახალი ამბები
თემურ აბაზოვი გაამართლეს
რუსთავის საქალაქო სასამართლომ მარნეულის ყოფილი მერის თემურ აბაზოვის მიმართ გამამართლებელი განაჩენი გამოიტანა. აბაზოვს ბრალი ჯგუფურად ჩადენილ დამამცირებელი და არაადამიანური მოპყრობის ფაქტზე ედებოდა. თემურ აბაზოვის ადვოკატმა გაგი მოსიაშვილმა განაცხადა,რომ ბრალდების მხარემ სასამართლოზე ვერ წარადგინა მტკიცებულებები, რომლის მიხედვითაც მარნეულის ყოფილი მერის ბრალეულობა დასტურდებოდა.

„დღეს თემურ აბაზოვისა და სხვათა მიმართ მიმდინარე დაუსაბუთებელ სისხლის სამართლის საქმეზე რუსთავის საქალაქო სასამართლომ მიიღო ობიექტური გადაწყვეტილება, როდესაც გამამართლებელი განაჩენი გამოიტანა. გამოძიებას ერთადერთ მტკიცებულებად ჰქონდა შედეგით დაინტერესებული და მიკერძოებული პირის ჩვენება, რაც სხვა მტკიცებულებებით არ დასტურდებოდა. საქმის არსებითი განხილვის დროს მტკიცებულებათა გამოკვლევით დადგინდა, რომ დაინტერესებული პირის მიერ მიცემული ჩვენება არასანდო და ურთიერთსაწინააღმდეგოა. მის გარდა გამოკითხული იყო ასზე მეტი მოწმე. არცერთი დაკითხული პირი არ ადასტურებდა თემური აბაზოვის ან სხვა პირთა მონაწილეობას იმ ქმედებაში, რის თაობაზეც მათ ბრალი ჰქონდათ წარდგენილი. თეიმურაზ აბაზოვის ბრალეულობა ვერ იქნა დადასტურებული. შესაბამისად, მოხდა ის, რაც უნდა მომხდარიყო. საქმეზე, სადაც არ არის მტკიცებულებები, საქმეზე, სადაც სუბიექტური დამოკიდებულება სჭარბობს და საქმეზე, სადაც უდანაშაულო პირს ჰქონდა ბრალი წარდგენილი, სასამართლომ მიიღო ერთადერთი სამართლიანი გადაწყვეტილება გამამართლებელი განაჩენის სახით,“ - განაცხადა გაგი მოსიაშვილმა.

კითხვაზე, საქმის არსებითი განხილვის დროს მოხდა თუ არა იმ ვიდეოს გამოკვლევა, სადაც ასახულია ერთ-ერთი მოქალაქის მიმართ არაადამიანური მოპყრობა, გაგი მოსიაშვილი პასუხობს, რომ მისი გამოკვლევა მოხდა. ადვოკატის განმარტებით, სასამართლო მსჯელობდა არა იმაზე, ნამდვილად აიძულეს თუ არა ერთ-ერთ პირს საკუთარი შარდით სახის დაბანა, არამედ იმაზე, მონაწილეობდა თუ არა ამ ქმედებაში თემურ აბაზოვი. უფლებადამცველის თქმით, ამ ქმედებაში თემურ აბაზოვის მონაწილეობა არ დადასტურებულა.

„აქ საქმე სხვა რამეა. კითხვაზე, ვინ ჩაიდინა ეს ქმედება, ჩვენი პოზიცია გახლავთ ის, რომ თეიმურაზ აბაზოვი და სხვა პირები, რომელთა მიმართაც იქნა ბრალი წარდგენილი, იყვნენ უდანაშაულო. აქედან გამომდინარე, აქ საქმე ეხება არა იმას, ეს ნამდვილად განხორციელდა თუ არა, ვინმემ აიძულა თუ არა და ა.შ. არამედ იმას, რომ თემურ აბაზოვი ამ ქმედებაში არ მონაწილეობდა,“ - განაცხადა გაგი მოსიაშვილმა.

კითხვაზე, რატომ დატოვა აბაზოვმა მერის თანამდებობა, თუკი უდანაშაულო იყო და რატომ არ დაელოდა სასამართლოს გადაწყვეტილებას, გაგი მოსიაშვილი პასუხობს, რომ აბაზოვმა საზოგადოების წინაშე მორალური პასუხისმგებლობა აიღო.

შეგახსენებთ, რომ მარნეულის ყოფილი მერი თემურ აბაზოვი 2018 წლის 13 ივნისს დააკავეს. გამოძიება მას ელჩინ ალახვერდიევის მიმართ არაადამიანურ და დამამცირებელ მოპყრობას ედავებოდა.

სტუდია „მონიტორმა“ ვიდეომასალა გამოაქვეყნა, სადაც მამაკაცი, რომელიც პარლამენტთან აქციაზე ბიძინა ივანიშვილს და მარნეულის მერს სიტყვიერ შეურაცხყოფას აყენებდა, არაადამიანური და დამამცირებელი მოპყრობის მსხვერპლი გახდა. როგორც სტუდია "მონიტორის" სიუჟეტშია ნათქვამი, სოციალურ ქსელში გავრცელდა ინფორმაცია, რომ ამ პიროვნებაზე ზეწოლა პარტია "ქართული ოცნების" ადგილობრივმა წარმომადგენლებმა და მარნეულის მერმა განახორციელეს.

მოგვიანებით, პროკურატურამ გაავრცელა განცხადება, სადაც ნათქვამი იყო, რომ თემურ აბაზოვმა ელჩინ ალახვერდიევს შეაფურთხა სახეში და მიაყენა ფიზიკური შეურაცხყოფა, შემდეგ აიძულა ჩართულიყო "ფეისბუქის" პირდაპირ ეთერში, მოეხადა ბოდიში და სიტყვიერი შეურაცხყოფა მიეყენებინა საკუთარი ცოლისთვის, ბოლოს კი მარნეულის მუნიციპალიტეტის მერმა თემურ აბაზოვმა ძალადობით, ღირსების შელახვის მუქარით, ელჩინ ალახვერდიევი აიძულა მოეშარდა ჭიქაში და შარდით მოებანა სახე.

2019 წლის თებერვალში თემურ აბაზოვმა მარნეულის მერის თანამდებობა დატოვა.
Print E-mail
FaceBook Twitter
დღის ამბები
➡ ბორჯომში ინფიცირების ახალი შემთხვევები შემცირდა.
✅ ბორჯომელი მოძღვარი მამა ზურაბი კოვიდ 19-ით გარდაიცვალა;
ინტერაქტივი
ბორჯომსა და მის სოფლებში მიმდინარეობს საზოგაო ინფრასტრუქტურის, წყლის სისტემის, სკვერების, დასასვენებელი სივრცეების და საფეხბურთო მოედნების მოწყობა-განახლება.
01 / აგვისტო 2020
შეავსეთ ტესტი და გაიგეთ, რამდენად კარგად იცნობთ ბორჯომ-ხარაგაულის ეროვნულ პარკს.   (ფოტოს ავტორი - კოტე იანტბელიძე ) //
ვალუტა
EUR
EUR
1
4.1450
GBP
GBP
1
4.7776
TRY
TRY
1
0.4147
USD
USD
1
3.4324
«« მაისი 2021 »»
2627282930 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 123456
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.