ამ მიზნით საქართველოში აშშ-ის სატყეო სამსახურის ექსპერტები - ენდრიუ ბოუერი და დენა ბატლერი ჩამოვიდნენ. საქართველოში აშშ-ის ელჩის იან კელის განცხადებით ეს არის ამერიკის მთავრობის ერთიანი დახმარების განუყოფელი ნაწილი საქართველოსთვის.
"მოხარული ვართ, რომ ჩვენი კოლეგები ამერიკის სატყეო სამსახურიდან ჩამოვიდნენ და შეუძლიათ დახმარება გაუწიონ საქართველოს მთავრობას აგვისტოში მომხდარი საშინელი ხანძრის შემდგომ, რომელიც ბორჯომში იყო. ეს ვიზიტი შესაძლოა ერთგვარად ჩაითვალოს აშშ-ის სატყეო დეპარტამენტის 2015 წელს დაწყებული სამუშაოების გაგრძელებად, რაც გულისხმობს საქართველოს მთავრობისთვის დახმარებას ტყეებში ხანძრების მართვის გეგმის შემუშავებაში. გარდა ამისა, მინდა აღვნიშნო, რომ ჩვენ შევძელით 120 000 დოლარის ექვივალენტის ტექნიკის გადაცემა საქართველოს მთავრობისთვის. სატყეო დეპარტამენტის წარმომადგენლები ველზე გავლენ და სხვადასხვა ასპექტებს შეისწავლიან, მათ შორის როგორიც არის ვეგეტაციის აღდგენა. ასევე დადებენ რეკომენდაციებს თუ რა ღონისძიებები უნდა გატარდეს იმისთვის, რომ შემდგომში ისეთი ბუნებრივი პროცესები, როგორიც არის მეწყერები, აცილებული იქნეს თავიდან. ეს არის ამერიკის მთავრობის ერთიანი დახმარების განუყოფელი ნაწილი საქართველოსთვის" - განაცხადა კელიმ.

საქართველოს ეროვნული სატყეო სააგენტოს უფროსის მოადგილის, ნათია იორდანიშვილის თქმით, ამერიკელი სპეციალისტების რეკომენდაციები შეეხება პირველადი გადაუდებელი ღონისძიებების განხორციელებასთან დაკავშირებით ადგილზე ნიადაგდაცვით, წყალდაცვით ღონისძიებებს და შემდგომ უკვე ტყის აღდგენის ღონისძიებებს.

"ამერიკის სატყეო სამსახურთან ეროვნულ სატყეო სააგენტოს ხანგრძლივი და ნაყოფიერი თანამშრომლობა აქვს. სწორედ ისინი იყვნენ ერთ-ერთი პირველები ვინც აგვისტოს ხანძრების პერიოდში გამოთქვეს დახმარება, რომ შესწავლის ნაწილში დაგვეხმარებოდნენ შესაბამისი პროფილის ექსპერტებით. დღეს ჩვენთან არის ორი ექსპერტი ჩამოსული, რომლებიც ჩვენ თანამშრომლებთან ერთად ადგილზე შეისწავლიან ნახანძრალ ტერიტორიებს და მათი რეკომენდაციები და რჩევები ძალიან დაგვეხმარება სამომავლო ღონისძიებების დაგეგმვის დროს. ისინი იმუშავებენ იმ კომისიასთან ერთად, რომელიც შექმნილია გარემოსა და ბუნებრივი რესურსების დაცვის სამინისტროში. მათი რეკომენდაციები ეხება პირველადი, გადაუდებელი ღონისძიებების განხორციელებასთან დაკავშირებით ადგილზე ნიადაგდაცვით, წყალდაცვით ღონისძიებებს და შემდგომ უკვე ტყის აღდგენის ღონისძიებებს" - განაცხადა იორდანიშვილმა.