საქართველოს ყოფილი მთავარი პროკურორი, ოთარ ფარცხალაძე დაჩქარებული წესით ჩუქნის შვილს იმ ქონებას, რომელიც მის სახელზეა რეგისტრირებული. სავარაუდო მიზეზი ისაა, რომ მან უკვე იცის, რომ ჩამოართმევენ საქართველოს მოქალაქეობას.

თითოეული ქონების დაჩქარებული წესით შვილისთვის გადასაფორმებლად საჯარო რეესტრში გადახდილია 350 ლარი.

ოთარ ფარცხალაძემ ანდრია ანზორ ფარცხალაძეს გადასცა კომერციული ფართები თბილისის ცენტრში, სასტუმროს ნომრები, ბინები და მიწის ნაკვეთი. უფრო ზუსტად:

სასოფლო სამეურნეო მიწა ტაბახმელაში (წავკისი) - 1001 კვადრატი;
სასტუმრო კომპლექსში ნომერი ბაკურიანში - 25 კვადრატი;
სასტუმრო კომპლექსში ნომერი ბაკურიანში - 26 კვადრატი;
კომერციული ფართი ვაკეში - 143 კვადრატი;
კომერციული ფართი ვაკეში - 336 კვადრატი;
კომერციული ფართი ვაკეში- 101 კვადრატი;
კომერციული ფართი ვაკეში - 204 კვადრატი;
ბინა საბურთალოზე - 78 კვადრატი;
ბინა საბურთალოზე - 91 კვადრატი;
ბინა საბურთალოზე - 38 კვადრატი.
ყველა ეს განაცხადი საჯარო რეესტრში 20 სექტემბერს 12:00 საათის შემდეგ შევიდა და პასუხი 18:00 საათამდე მიიღეს. უფრო ადრე, 19 სექტემბერს მმართველი პარტიის თავმჯდომარემ, ირაკლი კობახიძემ თქვა, რომ იუსტიციის სამინისტროს ფარცხალაძის მოქალაქეობის საკითხის შესწავლა დაწყებული ჰქონდა.

ოთარ ფარცხალაძემ ანდრია ანზორ ფარცხალაძეს აჩუქა შპს "ჯიპიეს კონსალტინგის" 100-პროცენტიანი წილიც.

14 სექტემბერს ცნობილი გახდა, რომ აშშ-ის სახელმწიფო დეპარტამენტის დოკუმენტის მიხედვით, საქართველოს ყოფილ მთავარ პროკურორს, ოთარ ფარცხალაძეს, სანქციები დაუწესდა საქართველოზე რუსეთის მანკიერი ზეგავლენის საპასუხოდ.

დოკუმენტის მიხედვით, სავარაუდოდ, რუსეთის უშიშროების ფედერალური სამსახურის ოფიცერი ონიშჩენკო დაეხმარა "თანამოაზრე" ფარცხალაძეს რუსული პასპორტის და შესაძლოა, რუსეთის მოქალაქეობის მიღებაშიც. ფარცხალაძეს "სრულად აქვს მიღებული რუსული იდენტობა და რეგულარულად მგზავრობს რუსეთში". ონიშჩენკო და უშიშროების ფედერალური სამსახური ფარცხალაძეს "ქართულ საზოგადოებასა და პოლიტიკაზე რუსეთის საკეთილდღეო გავლენის მოხდენაში იყენებენ". დოკუმენტში ასევე წერია, რომ გავრცელებული ინფორმაციით, ფარცხალაძემ პირადი სარგებელი მიიღო ონიშჩენკოსა და ФСБ-სთან კავშირით.

წყარო: რადიო თავისუფლება