ვალეში, ისევე როგორც სხვაგან, ინფრასტრუქტურული პრობლემებია. ადგილობრივები ამბობენ, რომ აქ ძირითადად წყლის, საკანალიზაციო სისტემის და ახალგაზრდებისთვის გასართობი საშუალებების პრობლემა აქვთ. ვალელები ამბობენ, რომ უმუშევრობის და მძიმე ეკონომიკური მდგომარეობის ფონზე მიწის ნაკვეთების მორწყვა ძვირი უჯდებათ.




საქართველოს გაერთიანებული წყალმომარაგების კომპანიამ, ქალაქ ვალეში წყალმომარაგების სისტემის სრული რეაბილიტაცია დაიწყო. ამ დროისთვის სამუშაოები აქტიურად მიმდინარეობს თამარ მეფისა და კაკაჩიშვილის ქუჩებზე. პროექტის ფარგლებში რეაბილიტაცია ჩაუტარდება წყლის არსებულ ცენტრალურ სათავე ნაგებობას, აშენდება ორი რეზერვუარი, მოეწყობა რვა ჭაბურღილი და მაგისტრალური მილსადენი, ასევე სრულად შეიცვლება შიდა ქსელი და მოხდება აბონენტების ინდივიდუალური გამრიცხველიანება. პროექტის განხორციელებას 6,400,000 ლარი მოხმარდება, სამუშაოების დასრულება 2020 წლის მაისში იგეგმება და შედეგად 3 700-მდე ადგილობრივი უზრუნველყოფილი იქნება უწყვეტი და ხარისხიანი წყალმომარაგებით.

რაც შეეხება სარწყავ წყალს, თვითმართველობაში ამბებენ, რომ ვალეში სარწყავი წყლის პრობლემა არ არის. გახარჯული ელექტროენერგიის საფასურის პრობლემის მოგვარება კი მათ არ შეუძლიათ.  ვალეში მომდევნო ეტაპზე საკანალიზაციო სისტემის პრობლემის მოგვარებაც იგეგმება. ასევე დაგეგმილია ცენტრალური გზის სრული რეაბილიტაციაც, რომელსაც საგზაო დეპარტამენტი განახორციელებს და სიჩქარის შემზღუდავი საგზაო ნიშნებიც მოეწყობა.


რაც შეეხება გასართობებს ახალგაზრდებისათვის. უკვე დასასრულს უახლოვდება კულტურის სახლის სრული რეაბილიტაცია და შენობა იქნება განახლებული. ასევე მათი განცხადებით, იუსტიციის სახლის სერვის ცენტრის მიმდებარედ მოეწყო სკვერები, აშენდა საბავშვო ბაღი და ა.შ. რაც ახალგაზრდებისთვის გართობის ერთგვარი საშუალებაა.