საჩხერის სამედიცინო ცენტრში ახალი კორონავირუსით ინფიცირებული ერთი პაციენტი გამოჯანმრთელდა. ინფორმაციას სამედიცინო ცენტრის მენეჯერი მიხეილ ქამუშაძე ადასტურებს.

"უახლოეს დღეებში მოსალოდნელია კორონავირუსის შიდა გავრცელების ინტენსივობის მომატება, ანუ მოახლოებულია პიკური სტადია. ამასთან დაკავშირებით, საქართველოს კლინიკების ასოციაცია საქართველოს მთავრობას და მოსახლეობას მოგმართავთ შემდეგი რეკომენდაციებით:

• ეფექტური პროფილაქტიკური და პრევენციული ღონისძიებების მიზნით რეკომენდებულია ჯანმრთელობის დაცვის სამინისტრომ დაუყოვნებლივ უზრუნველჰყოს საქართველოს მთელ ტერიტორიაზე (განურჩევლად რეგიონისა) მოსახლეობის მოწყვლადი ნაწილის ვირუსზე სწრაფი ტესტირების დაწყება;

• რეკომენდებულია საქართველოს ყველა რაიონული და საქალაქო სტაციონარული კლინიკა გადავიდეს ფუნქციონირების საგანგებო რეჟიმზე;

• პაციენტთა დიდი ნაკადის მიღებისათვის რეკომენდებულია პროფილის მიუხედავად ყველა კლინიკის ბაზაზე (მათ შორის რეგიონული კლინიკების) განხორციელდეს მობილიზაცია, განთავისუფლდეს მინიმუმ ერთი სართული ან იზოლირებული ფლიგელი;

• რეკომენდებულია საგანგებოდ აღიჭურვოს და დაჩქარებული წესით ექსპლუატაციაში შევიდეს ახალი აშენებული კლინიკები, მათშორის ,,ბათუმის რესპუბლიკური საავადმყოფო,, და ოკუპირებული აფხაზეთის საზღვრის პირა ,,რუხის მრავალპროფილური კლინიკა,,;

• რეკომენდებულია სახელმწიფოსგან გამოიყოს დამატებითი მატერიალური რეზერვები კლინიკებისთვის სამედიცინო და ლაბორატორიული მასალების მომარაგების თვალსაზრისით;

• პაციენტთა შეუფერხებელი ოქსიგენაციის უზრუნველსაყოფად რეკომენდებულია კლინიკების მომარაგება დამატებითი ჟანგბადის წყაროებით.

• ყველა კლინიკის ბაზაზე რეკომენდებულია უმოკლეს დროში უფროსი, საშუალო და უმცროსი სამედიცინო პერსონალის - მინიმუმ 2 ბრიგადის გადამზადება;

• მაღალი რისკის საქმიანობიდან გამომდინარე რეკომენდებულია დაწესდეს სამედიცინო პერსონალის ჯანმრთელობის სისტემატიური კონტროლი. ამავე დროს სიცოცხლისათვის საშიში რისკების აღმოფხვრის მიზნით ყველა კლინიკაში რეკომენდებულია შეიქმნას სპეციალური კომისია;

• რეკომენდებულია მთავრობამ გარკვეული დროით მძიმე, დაძაბული და სტრესული შრომის ფონზე გაათავისუფლოს სამედიცინო პერსონალი საშემოსავლო ბეგარისაგან;

• რეკომენდებულია პალატების, ფლიგელების, კორიდორების, რეგისტრატურისა და დამხმარე ოთახების დღეში რამდენჯერმე (სადეზინფექციო ხსნარების გარდა) ულტრაიისფერი სხივებით დამუშავება, კვარცის აპარატის გამოყენებით.

• ვირუსული დაავადება არ განარჩევს მორწმუნე და არამორწმუნე ადამიანს, ამიტომ რეკომენდებულია მოსახლეობამ ლოცვები აღასრულოს ინდივიდუალურად, სახლის პირობებში და მკაცრად მოერიდოს მასობრივ თავშეყრას;

• ვირუსის გავრცელების საუკეთესო საშუალებას წარმოადგენს მოსახლეობაში ნატურალური ფულადი კუპიურების ბრუნვა, ამიტომ რეკომენდებულია, უმოკლეს დროში ყველა სავაჭრო ობიექტის საბანკო ტერმინალებით აღჭურვა და საბანკო ბარათით გადახდის პრინციპის საყოველთაოდ დანერგვა" -ნათქვამია მიმართვაში, რომელსაც ასოციაცია ავრცელებს.

საქართველოს ჯანდაცვის მინისტრის ეკატერინე ტიკარაძის განცხადებით, ერთ კვირაში გვექნება მარნეულის სრული სურათი, რაც ჯანდაცვის სამინისტროს ეპიდემიოლოგიურ მონაცემებზე დაყრდნობით მარნეულის რეგიონში არსებული რისკის სრული მოცულობის იდენტიფიცირების საშუალებას მისცემს.

სემეკი კომუნალურ გადასახადებზე შეღავათების დაწესების შესახებ მთავრობასთან ერთად იმსჯელებს.

თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, მის საავადმყოფოში მოთავსებული პაციენტებიდან ორის მდგომარეობა განსაკუთრებით მძიმეა, მათ შორის ერთის მდგომარეობა კრიტიკულია.

"ჩემმა თანამშრომლებმა, ახალგაზრდა გოგო-ბიჭებმა, ხახაში უნდა ჩათხარონ ნიმუშის ასაღებად ჩხირები, მათ ამ დროს ავადმყოფები სახეში ახველებენ და მათ არაფრის ეშინიათ, აცადეთ ამ ადამიანებს ნორმალურად მუშაობა, ნუ მიაყენებთ შეურაცხყოფას " - ამის შესახებ დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის მოადგილემ პაატა იმნაძემ უწყებათაშორისი საბჭოს სხდომის დასრულების შემდეგ ჟურნალისტების კითხვის საპასუხოდ განაცხადა, რომელიც მარნეულში საველე ჰოსპიტალთან მოქალაქეების რიგებს შეეხებოდა.

საქართველოში 2 წლის ბავშვს კორონავირუსი დაუდასტურდა. როგორც ვახტანგ ბოჭორიშვილის სახელობის საავადმყოფოს კლინიკურმა დირექტორმა კახა იშხნელმა ჟურნალისტებს განუცხადა, ბავშვის მდგომარეობა კლინიკურად დამაკმაყოფილებელია.

"ხომ შეიძლება ევლოთ კარდაკარ და ჩამოერიგებინა ვიღაც 1-2 ადამიანს და არ გამოეწვიათ მოსახლეობის შეკრება" - ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილემ, პაატა იმნაძემ ზუგდიდში “ნაციონალური მოძრაობის” მიერ პირბადეების დარიგებასთან დაკავშირებით განაცხადა.

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის კლინიკური დირექტორის, ლალი ტურძელაძის განცხადებით, ბოლნისიდან თბილისში გადმოყვანილ, 22 კვირის ორსულს სწრაფი ტესტის ჩატარების შედეგად, კორონავირუსი დაუდასტურდა.

საქართველოში კორონავირუსით ინფიცირების შემთხვევათა რაოდენობა 79-მდე გაიზარდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 4346 ადამიანი, ხოლო სტაციონარში მეთვალყურეობის ქვეშ - 247 პირი.