ახალციხეში ხანძარს შუახნის მამაკაცის სიცოცხლე ემსხვერპლა
13:00 / 23.10.2020
ახალციხეში, კორპუსში გაჩენილ
ხანძარს შუახნის მამაკაცის სიცოცხლე ემსხვერპლა. ხანძარი
დიდიმამიშვილის ქუჩაზე 5-სართულიანი კორპუსის მე-5 სართულზე გაჩნდა.
სახანძრო-სამაშველო ჯგუფები ადგილზე 4 წუთში გამოცხადდნენ. ამ
დროისთვის ხანძარი ლიკვიდირებულია.ინფორმაციას "მეცხრე არხი"
ავრცელებს.
როგორც საგანგებო სიტუაციების მართვის სამსახურში აცხადებენ, ადგილზე
მისულ მაშველებს შუახნის მამაკაცი გარდაცვლილი
დახვდათ."სახანძრო-სამაშველო ჯგუფები ადგილზე იყვნენ ოთხ წუთში.
ცეცხლი ეკიდა საწოლსა და მის გარშემო იატაკს. ხანძარი ლიმვიდირებულია.
მეხანძრე-მაშველებმა სახლში იპოვეს შუა ხნის ასაკის მამაკაცის
ცხედარი", - აცხადებენ საგანგებო სიტუაციების მართვის სამსახურის
პრესცენტრში.
"ფეხები დამწვარი ჰქონდა და სავარაუდოდ ნასვამ მდგომარეობაში იყო" -
განუცხადა სასწრაფო-სამედიცინო დახმარების სამსახურის ექიმმა სარვარ
საფაროვმა.
შინაგან საქმეთა სამინისტროში ამბობენ, რომ გამოძიება სისხლის
სამართლის 187-ე მუხლის მესამე ნაწილით დაიწყო, რაც გულისხმობს ნივთის
დაზიანებას ან განადგურებას, რამაც გაუფრთხილებლობით გამოიწვია
ადამიანის სიცოცხლის მოსპობა ან სხვა მძიმე შედეგი.