სოფელ აგარაში მკვლელობა მოხდა. არსებული ინფორმაციით, მამაკაცმა ცივი იარაღით ცოლი დაჭრა, ერთი მამაკაცი კი მოკლა.

შინაგან საქმეთა სამინისტროში განაცხადეს, რომ დაჭრილი ქალი საავადმყოფოშია გადაყვანილი.მისი ჯანმრთელობის მდგომარეობა უკიდურესად მძიმეა. 50-წლამდე ასაკის ქალი ქარელის ცენტრალურ საავადმყოფოში მოათავსეს.

„პაციენტი კლინიკაში უმძიმესი მდგომარეობით შემოვიდა. მას სხეულის სხვადასხვა არეში, ბასრი საგნით მიყენებული 10-ზე მეტი ჭრილობა აღენიშნება. დაზიანებები მიყენებული აქვს კისრის, სახის, გულ-მკერდის წინა და უკანა ზედაპირის არეში, ასევე მუცლის არეში რამდენიმე შემავალი ჭრილობაა. პაციენტს დაზიანებული აქვს კუჭი, ფილტვები. გადაუდებელი ქირურგიული ოპერაცია ჩაუტარდა, თუმცა, მისი მდგომარეობა კვლავ კრიტიკულია“ - განაცხადა ქარელის ცენტრალური საავადმყოფოს ქირურგმა ლექსო ხეთაგურმა.

რაც შეეხება დანაშაულის ჩამდენ პირს, ის იდენტიფიცირებულია. თუმცა, დაკავებული არ არის.

უწყების ინფორმაციითვე, მომხდართან დაკავშირებით გამოძიება სსკ-ის 108-ე მუხლით მიმდინარეობა, რაც განზრახ მკვლელობას გულისხმობს.