გასულ თვეში, საქართველოში ხე-ტყის უკანონო მოპოვების 587 ფაქტი დაფიქსირდა, სამცხე-ჯავახეთში კი 46 შემთხვევა მოხდა. აღნიშნული რაოდენობიდან 20 შემთხვევა ბორჯომში გამოვლინდა. მუნიციპალიტეტში ყველაზე რთული ზონა ბაკურიანის სატყეო უბანია. გარემოსდაცვითი ზედამხედველობის დეპარტამენტში ამბობენ, რომ გუჯარეთის ხეობის მხარეში, ზამთარში იკლებს აღნიშნული შემთხვევების რიცხვი, ზაფხული კი ის პერიოდია, როდესაც უკანონოდ მოპვებული ხე-ტყის გამოვლენა ყველაზე ხშირად ხდება. 



„სამცხე-ჯავახეთში გამოვლენილი 46 ფაქტიდან, ბორჯომში 17 შემთხვევა იყო ხე-ტყის უკანონო ტრანსპორტირების, 3 ფაქტი კი სახერხი საამქროს ტექნიკური რეგლამენტის დარღვევა იყო. დანარჩენი 26 შემთხვევა, რეგიონის სხვა მუნიციპალიტეტებში ნაწილდება. ბორჯომის მუნიციპალიტეტი და კერძოდ ბაკურიანის სატყეო უბანი არის ერთ-ერთი რთული ზონა ჩვენთვის“ - აცხადებს ტელეკომპანია „ბორჯომთან“ საუბრისას პაატა პარუნაშვილი, გარემოსდაცვითი ზედამხედველობის დეპარტამენტის სამცხე-ჯავახეთის რეგიონული სამმართველოს ინსპექტირების განყოფილების მეორე კატეგორიის უფროსი სპეციალისტი ინსპექტორი.



ყოველწლიურად, ხე-ტყის უკანონოდ მოპოვების 40-მდე შემთხვევა ფიქსირდება ბორჯომ-ხარაგაულის ეროვნული პარკის ტერიტორიაზე. მათი ინფორმაციით, ხშირად ხდება რომ იჭრება დაუნომრავი, საღი ხეები, რაც აზიანებს ბუნებას და გარემოს. მიუხედავად იმისა, რომ რეინჯერებიც მუდმივად ახორციელებენ პატრულირებას, ზამთრის პერიოდში ასეთი შემთხვევების რიცხვი საგრძნობლად იზრდება, ამის მიზეზი კი სავარაუდოდ არაგაზიფიცირებული სოფლებია, რის გამოც მოთხოვნა იზრდება საშეშე მერქანზე და სწორედ ამის გამო, წლიდან წლამდე ტყეს, ბუნებრივი რესურსი აკლდება. 



აღსანიშნავია ის, რომ ბორჯომის მუნიციპალიტეტში არის დარჩენილი რამდენიმე სოფელი, სადაც გაზი შეყვანილი არ არის. ეს სოფლები კი ძირითადად დაცულ ტერიტორიებს ესაზღვრება, მათი მოსახლეობა კი ბორჯომ-ხარაგაულის ეროვნული პარკის ბენეფიციარები არიან ხე-ტყის მოპოვებასთან დაკავშირებით.

პაატა პარუნაშვილის თქმით კი, ხე-ტყის უკანონო მოპოვების ფაქტების ძირითადი მიზეზი, როგორც მოსახლეობა ასახელებს მძიმე სოციალური მდგომარეობაა. გარემოსდაცვითი ზედამხედველობის დეპარტამენტში ამბობენ, რომ მათი წარმომადგენლები ყოველდღიურად, 24 საათიან რეჟიმში ახორციელებენ პატრულირებას. კერძოდ: ბორჯომის მუნიციპალიტეტში, რომელიც ერთ-ერთი რთული ზონაა, მუდმივად მუშაობს 2 ეკიპაჟი, საჭიროების შემთხვევაში კი ემატებიან მეზობელი მუნიციპალიტეტებიდან. რაც შეეხება სანქციებს, ჯარიმის ოდენობას განსაზღვრავს მიყენებული ზიანის ხარისხი.




„თუ ადმინისტრაციული სამართალდარღვევაა, იგზავნება სასამართლოში. გააჩნია რამდენია გარემოზე მიყენებული ზიანის ოდენობა, იმის მიხედვით განისაზღვრება ჯარიმაც. თუ ზარალი იმდენად დიდია, რომ გადააჭარბა და აღარ ითვლება ადმინისტრაციულ სამართალდარღვევად, გადადის სისხლის სამართლის დანაშაულში და შემდგომ გადაეგზავნება პროკურატურას“ - პაატა პარუნაშვილი.

ხე-ტყის უკანონო ჭრისა და ტრანსპორტირების ყველაზე მეტი ფაქტი 2017-2018 წწ-ში დაფიქსირდა. შემთხვევების რაოდენობამ ორივე წელს თითქმის 3 000-ს გადააჭარბა. ბოლო 4 წელიწადში კი მთელი ქვეყნის მასშტაბით, 8 812 სამართალდარღვევა დაფიქსირდა. ბორჯომის მუნიციპალიტეტში კი ბოლო ოთხი წლის მონაცემები ასე გამოიყურება, დაფიქსირდა 1261 ფაქტი, აქედან სისხლის სამართლის პასუხისგებაში 79 პირი მიეცა. უკანონოდ მოპოვებული ხე-ტყის ოდენობამ 5656 კუბური მეტრი, გარემოსთვის მიყენებული ზიანის ოდენობამ კი 762 871 ლარი შეადგინა.